रामभरोस कापडि़ ‘भ्रमर’ | Ram Bharosh Kapari Bhramar | नेपाल प्रज्ञा–प्रतिष्ठान | Nepal Pragya Pratisthan | Haiku | Maithili Haiku

हुनक हाइकु के प्रकृति पक्ष मजबूत छन्हि । छोट शब्द मे प्रकृतिक जे सौन्दर्यक व्याख्या हुनक हाइकु मे आएल अछि ओ मुग्धकारी अछि । किछु हाइकु के देखि स्वतः एकर भान भऽ जाएत :–

वर्षाक बुन्द

इन्द्र धनुषी रुप

धन्य प्रकृति ।

प्रचण्ड गर्मी

छटपट दादुर

भथल कूप ।

    उपर के किछु पंक्ति मे जेना प्रकृति सजीव भऽ आगा मे ठाढ़ भऽ गेल हो । कूप मे बास बनौने बेंग प्रचण्ड गर्मी सँ सुखल अपना बासक अभावे कोना छटपटा रहल अछि, एहि दृश्यबिम्ब के ठाढ़ करैत कवि ( हाइकुकार ) सम्पूर्ण परिवेश के जीवन्त कऽ देने  छथि ।

कचबचिया

करैए कचबच

पहर बोध ।

    विशुद्ध गाम–घरक अप्पन सांस्कृतिक परिवेश आ तकरा परम्परागत मान्यताक शब्द मे रुपान्तरण । हम मुग्ध छी एहि कविक बिम्बक पकड़ आ तकर सन्धान पर । विनीतजी खूब समधानि कऽ मैथिली काव्य साहित्य जगत मे हाइकुक स्थापना कएलनि अछि ।

    मनुक्खक आम जिनगीक पल–पल घटैत घटना आ तकर प्रभावक मूल्यांकन कतौ एहनो भऽ सकैछ :–

मगरमच्छ

दयालु साधु लग

बहाबे नोर ।

    हाइकुक शब्द अनुशासन के बेसी हद धरि आत्मसात करैत प्रकृति आ मानवीय धरातलक सूक्ष्म तरंग के अपन शब्दक तूलिका सँ जाहि तरहेँ हृदयग्राही विधाक निर्माण कएलनि अछि – मैथिली साहित्य हुनक एहि शब्द कौशल सँ समृद्ध भेल अछि । हमरा लगैत अछि आबऽ बला समय मे हाइकुक सूक्ष्म अन्तरिक्ष मे विचरण करैत बहुतो नामधारी ग्रह–उपग्रहक मध्य विनीतजीक ई नवका उपग्रह ‘वसुन्धरा’पठनीय आ संग्रहणीय कृतिक रुप मे समादृत होयत से हमरा विश्वास  अछि ।

        रामभरोस कापडि़ 'भ्रमर’

        पूर्व सदस्य

        नेपाल प्रज्ञा–प्रतिष्ठान

        कमलादी, काठमाण्डू

Maithili Haiku by Binit Thakur / Ram Bharosh Kapari 'Bhramar' / Maithili Literature | Maithili poet